on.cc東網直播 x 港台電視32下午5時播映港超聯好戲碼 大埔迎東方綠藍激鬥！

今日「中銀人壽香港超級聯賽」可謂好戲連場，其中頭場矚目大戰，大埔坐鎮大埔運動場火併另一支「亞冠盃2」香港代表東方。兩隊上周中同樣出戰亞洲賽，體力難免有影響，但為免被前列拋離，今仗絕不會放軟手腳，為3分鍊到盡！（on.cc東網周日下午3時直播；港台電視32周日下午5時播映）

大埔上周四在「亞冠盃2」主場激和北京國安，休息僅僅兩日又要硬撼東方，但在該仗後備上陣的費蘭度，有信心球隊在輪換下維持一定戰力：「賽程咁密考驗梗係大，但球隊陣容深度唔錯，所有隊友都做足準備，教練團又好信任球員，希望大家努力踢出部署。」

費蘭度要贏番場

展望今場，費蘭度預計戰況非常激烈，強調全隊戰意十足：「雖然東方係好難纏嘅對手，但球隊已經先後打和傑志同北京國安，係時候贏番場振奮士氣，兼繼續追貼榜首。」陣容方面羅振庭需要停賽，而「高級組銀牌」對理文一役領紅的鍾偉強，亦需加監一場，連同加比爾繼續有傷在身，3人將會缺陣。

同樣剛剛出戰「亞冠盃2」的東方，休息時間雖較大埔多一日，惟球隊要遠征泰國，踢足全場的右閘賀爾承認舟車勞頓令身體更疲累，但相信有足夠時間恢復。上場雖以1比5不敵拉查武里，賀爾指大敗亦有得着：「當然冇人想輸波，但對手實力同本地球隊相差好遠，係一次幾好機會，去體驗其他國家嘅足球水平差距幾大，從中學習。」

賀爾：專注做好自己就夠

東方上月初在「聯賽盃」與大埔交手，當時以1比3落敗，賀爾認為該項比賽不設外援限制，並不能與聯賽相提並論：「大埔進攻能力好強，陣容深度都夠，但我哋實力都唔差，近期仲有好多年輕球員上位。只要專注做好同相信自己，絕對有能力攞3分。」不過中堅丹尼爾因觸傷右膝舊患，上陣成疑。