爾冬陞嘆「唔夠戲」 金像獎2027年或縮水
爾冬陞感慨電影市道陷低潮期。
身為香港電影金像獎協會董事局主席的爾冬陞（小寶），昨日出席活動時，對於演員張繼聰早前表示擔心電影開拍數目下跌，片源令金像獎有朝一日可能未能繼續舉辦，他亦承認表示：「過去兩年我哋一直關注緊呢件事，因為我哋都問政府申請撥款，政府錢即是納稅人嘅錢，依家財赤我哋仲問撥款，我都聽到有唔少人唔開心，用公帑搞呢個活動，覺得愈嚟愈冇代表性。」
他表示曾粗略估計，直到年底，相信今年僅有40套電影推出：「今年仲可以，仲搵咗導演吳煒倫做金像獎節目總監，嚟緊呢兩個禮拜會開會，相信今年政府撥款唔會好似以前咁爽手，我哋要努力作出減省。手頭上都有啲方案嘅，好似唔喺文化中心搞，咪去酒店。」至於會否擔心2027年電影片源問題更差時，他說：「我當然唔希望有咁嘅情形出現，不過依家發展到『電影發展基金』已經係最大嘅老闆。今年係我入行50周年，係我見到香港電影最低潮嘅一年，我驚出年可能仲有得再低。始終有新血加入，依家啲年輕人好捱得，我覺得係改朝換代嘅時候，中間可能有3幾年比較難打啲囉！」