聞李施嬅「借床」事件 胡杏兒O嘴

藝人袁澧林與胡杏兒於新片《第四幕》中與馮德倫有感情轇轕，前者曖昧，後者則飾演前度。昨日開鏡禮上，兩女惺惺相惜，影大合照時更互推C位，當袁澧林獲送生日蛋糕吹蠟燭時，杏兒亦主動幫她接過花束。

問到生日願望，袁澧林說：「手頭上有兩套拍咗4年嘅戲，希望可以快啲推出，驚個樣唔同咗嚇親觀眾，同埋想呢套戲拍攝順利。（今晚點慶祝？）啱啱先知可以8點收工，即刻約咗好朋友食飯。（追求者？）邊有咁多人追呀！」

杏兒透露今次於片中扮演資深舞台劇演員，可謂演回老本行。談到好友胡定欣新婚返港，她笑指工作太忙依然未約實飯局：「費事轟炸佢，相信好多朋友都搵緊佢，我諗佢Settle Down嘅話，會約我哋出嚟。（李施嬅真係同前度復合？）唔知，不過佢嘅前度係一個好人，佢哋可能相處上唔係咁夾，但唔代表係衰人，都係畀空間佢啦！」至於李施嬅投訴前度帶朋友返家留宿並睡她的床，杏兒聞言語塞，身旁的袁澧林即代解圍轉移話題：「咁我可唔可以去你屋企瞓？如果可以，煞科嗰晚就去啦！」杏兒笑答：「你嚟梗係得啦，幫你換埋床單添！（咁你老公瞓邊？）瞓廳囉！」